Manipur CM Biren Singh leh Assam Rifle chief an inhmu

Manipr chief minister N Biren Sigh leh Assam Rifles director general, lieutenant general PC Nair-te chu kar liam ta Inrinni khan inkawmin, state chhunga venhimna leh AR chungchangte an sawi dun.

Manipur BJP MLA-te leh Meitei pawl ṭhenkhatin an state-a buaina chhuak mekah, Assam Rifles-te chu hnam ṭan bik neia an puh hnuah, Assam Rifles hotu leh CM-te hian meeting hi an nei a ni.

Hemi hma hian Indian Army Eastern Command Army Commander Lt. Gen. Rana Pratap Kalita chuan Manipur hi tlawhin, CM Singh leh state security advisor Kuldiep Singh-te chu Manipur tualchhung buaina chhuak chungchangte a lo sawipui tawh bawk.

Manipur-a Meitei leh Kuki Zomi-te inkara tualchhung buaina a chhuah hnuah, buaina chhuak zel tur veng turin hnam pahnihte tamna hmunah Assam Rifles-te hi dah an ni. Mahse Meitei hnamte chuan Assam Rifles-te chu Kuki Zomi-te ṭanah puhin, pawl ṭhenkhat phei chuan Assam Rifles-te chu state aṭanga chhuahtir an phut.

Tun hnaiah Assam Rifles-te chuan Meitei awmna hmun Bishnupur district-ah Kuki-Zomite awmna hmuna kal tur Manipur police motor an dan avangin security force pahnihte inkarah buaina a chhuak a, Manipur police-te chuan Meitei pathum thattua puh Kuki militant-te an zawng tih sawiin, Assam Rifles-te'n an lo dan avangin tualthattute chu an tlanchhiat theih phah tiin an puh. Manipur police lam hian Assam Rifles lakah FIR an theh lut hial a ni.

Manipur-ah hian Assam Rifles battalion 20 an awm a, ramri veng tur leh sorkar laka hel tur veng tura dah an ni. May 3-a tualchhung buaina a chhuah hnuah battalion pahnih dah belh leh niin, Meitei leh Kuki awmna hmuna buaina chhuak zel tur veng turin an hna hi siamrem a ni.

Manipur-ah hian Assam Rifles bakah Manipur police, Indian Army leh Central Armed Police Forces (CAPF) mi leh sate chu buaina chhuak zel tur vengin rim takin an duty mek bawk.