Manipur HC-in mobile internet tinung turin state sorkar a hriattir

Manipur-a mobile internet tinung tura mi tam takin Court-ah ngenna an theh luh hnuah, Manipur High Court chuan state sorkar chu mobile internet tihnun dan kawng ngaihtuah turin a hriattir.

Court official chuan internet tinung tura ngenna theh luhte chu justice Ahanthem Bimol Singh leh justice A Guneshwar Sharma ṭhutna division bench chuan kar liam ta khan ngaihtuahin, Manipur sorkar chu state chhungah mobile internet tihnun dan kawng dap tura hriattirna an tichhuak tih a sawi.

"Home department chuan mobile number-te whitelist a, mobile phone-a internet service tihnun leh dan a ngaihtuah a ngai. Hemi tihlawhtling tur hian state thuneitu hnenah hriattirna pek a ni tawh a, report hi hriattirna tihchhuah tukah theh luh nghal tur a ni. Court chuan hemi chungchang hi August 31-ah a ngaihtuah leh ang," tiin High Court chuan a sawi.

Manipur-ah hian May 3-a tualchhung buaina a chhuah aṭang khan internet service hi tihtawp a ni a, line ṭhenkhat tihnun ni bawk mah se, hmun tam zawkah chuan internet hi tihtawp chhunzawm zel a la ni.