AP sorkarin kawlphetha MW 11,523 siam chhuahna tur inremna ziak
Arunachal Pradesh sorkar chuan kar liam ta Inrinni khan, central public sector undertaking (CPSU) hnuaia company pathum chu hydropower project 12 thawk turin inremna thuthlung (MoA) a ziahpui. Project 12 aṭang hian kawlphetha MW 11,523 siam chhuah theih beisei a ni.
He project thawhna atan hian Rs. vbc 1,42,000 ruahman a ni tih sorkar official chuan a sawi.
Kawlphetha MW 2,626 siam chhuahna tur project panga chu NEEPCO-in an thawk dawn a, SJVN Limited chuan project panga thawk bawkin kawlphetha MW 5,097 an siam chhuak thung ang. Kawlphetha MW 3800 siam chhuahna tur project pahnih chu NHPC-in an thawk dawn bawk a ni.
MoA sign-naah hian union power minister R K Singh, chief minister Pema Khandu leh sorkar official ṭhenkhatte an tel. Sorkar aiawhin state power commissioner Ankur Garg chuan MoA hi a sign a, CPSU aiawh hian SJVN CMD Nand Lal Sarma, NHPC technical director Biswajit Basu leh NEEPCO technical director Ranendra Sharma-te'n MoA hi an sign thung.
Kawlphetha siam chhuahna tur project hi kum liam ta lamah khan independent power developer-te thawhtir tum a lo ni tawh a, mahse, chhan hrang hrang avangin hna hi thawh ṭan a la ni lo. Hei vang hian state sorkar chuan, project hi CPSU-te thawhtir a tum ta zawk tih sorkar official chuan a sawi.
Union Minister R K Singh chuan kawlphetha siam chhuak tura inremna thuthlung ziah chu hun pawimawh leh chinchhiahtlak tak a ni tih sawiin, project 12 zinga pasarih emaw pariat emaw chu nakkum March thla aṭanga thawh ṭan a nih tur thu a sawi. Minister chuan, "Kum 2030-a kawlphetha GW 500 siam chhuak tura Nationally Determined Contribution (NDC)-in target a neih tih hlawhtlinna kawngah heng project-te hian nasa takin a pui dawn a ni," tiin a sawi.
Chief Minister Khandu pawhin prime minister Narendra Modi leh Power Minister Singh-te chungah lawmthu sawiin, heng project-te hian state ṭhan lenna kawngah nasa taka a puih dawn bakah, ram puma kawlphetha kan hnianghnar theihna turin nasa takin a pui dawn a ni, a ti.