CBI-in Manipur buaina kaihhnawih case 9 lak belh dawn

Central Bureau of Investigation (CBI) chuan Manipur tualchhung buaina kaihhnawih case pakua a lak belh dawn tih sorkar official-in a sawi. Case pakua a lak belh tur nen hian, CBI chuan a vaiin Manipur case 17 a chhui dawn a ni.

CBI chuan case dang pawh a la lak mai theih thu official chuan a sawi a, hmeichhiate laka hleilenna leh hmeichhe chunga pawikhawihna case dang a awm a nih chuan, ngaihpawihmawh a ni ang, a ti.

CBI-ah hian case pariat register ni tawhin, hmeichhe chunga hleilenna case pahnih a tel.

Official chuan case thar pakua register leh turin hma lak mek a ni a, Churachandpur district-a hmeichhe chhunga hleilenna case pakhat pawh a lak rin a ni tih a sawi.

Khawtlangah chi bing inṭhenna nasa tak a thlen mek avangin, Manipur buaina kaihhnawih case chhui chungchangah CBI chu fimkhur taka chet a ngaih thu official chuan sawiin, hnam pakhat inhnamhnawihna a awm chuan, lehlam atangin inmawhpuhna a thleng dawn a ni, a ti.

CBI-in case a chhui zinga ṭhenkhat chu Scheduled Castes and the Scheduled Tribes (Prevention of Atrocities) Act, 1989-in a huam a, police officer deputy superintendent chin khawih tur a ni.Deputy SP-te chu hemi case-ah hian supervisory officer an nih theih loh avangin, CBI chuan investigation vil hna chu SP-te kutah a dah tih official chuan a sawi.

Hmeichhe chunga hleilenna case bawhzui tur leh pawihkhawihna tuartute thu zawh fiah hna thawk turin CBI chuan state chhunga hmeichhe police officer-te chu a hmang dawn bawk a ni.