Assam-ah delimitation duh loin nawrh huaihawt AGP MLA Hazarika a bang

Assam-a assembly leh Lok Sabha bial huam chin siam ṭhat (delimitation) duh loh avangin Asom Gana Parishad (AGP) MLA Pradip Hazarika chuan an party-a a nihna zawng zawng aṭanga banna a theh lut. Delimitation final report buatsaihah hian Pradip Hazarika bial Amguri chu paih a ni.

Zirtawpnia Election Commission (EC)-in final report a tihchhuahah, state chhunga assembly constituency 126 leh Lok Sabha seat 14 chu khawih danglam a ni lo a, mahse, Lok Sabha seat khat leh assembly constituency 19 bial huam chin siam ṭhat a ni thung.

Assembly 19 leh Lok Sabha seat pahnih chu Scheduled Tribe (ST) tan reserve niin, assembly pakua leh Lok Sabha seat pakhat chu Scheduled Caste (SC) tan dah a ni.

Minister hlui Hazarika chuan AGP-a a nihna zawng zawng, party general secretary post thlengin a ban san. AGP hi BJP kaihhruai Assam sorkarah an tel ve."Ka bialte ka ti hlawhchham a ni. Amguri bial hi delimitation draft theh luhah khan paih a ni a, mahse, paih lo turin theihtawpin kan bei. Final report a lo chhuah khan, kan thil phutte chu tihhlawhtlin a ni lo tih kan hre ta a ni," tiin Hazarika chuan AGP chief Atul Bora hnena banna a theh luh hnuah a sawi. Party-a a nihna zawng zawng ban san mah se party erawh a chhuah san lo tih a sawi.

Amguri bial mipuite pawhin Amguri bial paih an duh lohna lantirin nawrh an huaihawt a, chief miinister Himanta Biswa Sarma leh Hazarika demna thute an au rual. Sarma leh Hazarika lem hal an tum chu police-in ṭhelh mah se, final delimination report duh lohna lantir nan an kawrte an phelh a ni.

Eptu pawl Raijor Dal pawhin delimitation duh loin Sivasagar district-ah nawrh an huaihawt a, hun eng emaw chen kawngpui an dang.

All Tiwa Students’ Association chuan tribal tana Morigaon seat pek a nih loh avanga an lungawi loh thu sawiin, "State sorkar leh EC hnenah Morigaon chu ST tana dah a ṭulzia kan thlen tawh. Mahse, kan thil phut hi tihhlawhtlin a ni lo. Sorkar hian Tiwa hnam hi indigenous-ah min pawm loah kan ngai," tiin thuchhuah an siam.

Final delimitation report-ah hian state chhunga assembly leh parliament constituency chu 2001 census behchhanin rin ṭhat a ni. Assam Delimitation excercise hnunhnung ber chu 1971 census behchhanin kum 1976 khan neih a ni.