Kuki InpI Manipur-in Amit Shah thusawi sawisel

Kuki pawl lian, Kuki Inpi Manipur (KIP) chuan Parliament monsoon session-a union home minister Amit Shah-a'n Manipur chungchang a sawi chu na takin an sawisel.

Amit Shah-a'n Parliament-ah Manipur-a tribal community-te chu Myanmar raltlante an ni tia a sawi chu sawiselin KIP chuan, Amit Shah thusawi chu thil pawi tak niin,a barakhaih hle tih an tarlang. Manipur-a buaina chhuak chu Kuki tam tak Manipur-a an lo luh vang tia a puh hi thil dik lo a ni, an ti.

Kuki Inpi chuan Meitei hoin Kuki-te an puh chhan chu thikna leh dodal duh vang ngawr ngawr bak a ni lo a, an thu sawiah hian ṭanchhan mumal engmah an nei lo tih sawiin, Manipur pawna khawsa Kuki-te hian Manipur buaina chungchangah inhnamhnawihna leh inrawlhna engmah an nei lo tih an sawi bawk.

Ṭanchhan leh finfiahna mumal engmah awm loa dik lo taka Kuki hnam an puh avangin Union Home Minister leh Manipur chief minister N Biren Singh chu demin, hetiang ṭawngkam chhakchhuah hi thil tih awm lo leh huattlala a nih mai bakah, state chhung buaina tizualkai thei thil a ni, an ti. An ṭawngkam hman hian Kuki hnam chanchin, chawr chhuahna leh nihna thlengin a pawi zawngin nghawng a nei thei, an ti bawk.

Kuki Inpi chuan Amit Shah chuan Kuki-te chu N Biren Singh-a maichamah halral thil hlan atan a hmang tiin an sawi.

Chief Minister N Biren Singh leh a hote chu Manipur chhunga Meitei-te dinhmun sawhngheh nan Kuki hnamte tihchimih tuma hma la mekah an puh bawk.

KIP chuan Union Home Minister chu Kuki hnam a puhchhiatna chu thil hlauhawm tak a ni tih sawiin, thudik a sawi ngei tih finfiahna a pek an beisei a, a pe thei lo a nih chuan ngaihdam dil turin an phut tih an sawi.