High Court-in Moreh-a in leh lo tlanchhiatsante venghim turin Manipur sorkar a hriattir

Manipur High Court chuan tualchhung buaina chhuak avanga Moreh khuaa in leh lo tlanchhiatsan takte venghim tura state sorkar hmalaknate a zawt.

Justice Ahanthem Bimol Singh leh A Guneshwar Sharma ṭhutna bench chuan state sorkar chu in leh lo tlanchhiatsante a venhim loh chhan chu affidavit hmanga kimchang taka tarlang turin thupek a ti chhuak bawk. In leh lo tlanchhiatsante hi a tam zawk hal leh rawk zui an ni.

State aiawha ding Additional Advocate General M Devananda-a'n a ngen angin, bench chuan state sorkar chu kar hnih chhung hun a pe.

Congress hruaitu Khumanthem Devabrata Singh-a'n in tlanchhiatsan chu misualin rawkin, an hal bawk tia PIL a theh luh chu Court-in ngaihtuahin thupek hi a tichhuak ta ni. Petition theh luttu aiawh, ukil S Biswajit chuan Moreh khuaa in leh lo tlanchhiatsante venghim turin High Court chuan interim order vawi hnih tichhuak tawh mah se, in rauhsan 20 bawr vel chu hal an ni a, a ṭhen rawk an ni bawk tih a sawi. Moreh khuaa security force dahte chu in leh lo tlanchhiatsante venhim kawngah an hlawhchham chiang hle a ti bawk.

High Court chuan petition theh luttu dilna phalsakin, state sorkar chu insawifiah turin a hriattir. August 31-ah hemi chungchang hi ngaihtuah chhunzawm leh a ni ang.