Meghalaya-in festival hrang hrang buatsaih dawn

Meghalaya state chuan zin mite hipna turin festival hrang hrang a buatsaih chho dawn tih tourism minister Paul Lyngdoh chuan a sawi.

Minister Lyngdoh chuan, "Meghalaya state hi India ramchhunga zin mite tlawh chak ber hmuna siam turin event hrang hrang buatsaih a ni dawn," a ti.

Umtham khuaah kum tina an neih ṭhin annual whitewater contest, ni thum awh, Megha Kayak Fest chu October 12-14 chhungin neih a ni dawn. Megha Kayak Fest hi Shillong Literary Festival in a chhunzawm ang. Literary Festival hi hnam ro hlu zir chianna, hriselna leh naupang leh ṭhalaite chawikanna tura buatsaih a ni a, Shillong khawpuiah November 14-16 chhungin neih a ni ang.

Tourism Minister chuan zin mi tam tak hip ṭhin Shillong Cherry Blossom Festival chu November 17-19 chhunga neih a ni dawn bawk tih sawiin, Cherry Blossom Festival hi Ri Bhoi district-ah neih a ni ve thung dawn a ni.

Mukroh hmuna inkahna thleng avangin nikum khan Cherry Blossom Festival hi ṭhulh a ni. Festival organiser Jason Manner chuan nikum khan ticket 12,000 hralh chhuah hman a ni tih sawiin, mi 60,000 chuangin Meghalaya hi tlawh tura chhut a nih thu a sawi.

"Rs vbc 1.25 hu ticket refund a ni a, kumin January kar tirah khan ticket refund hi tihfel zawh a ni," a ti a, festival an cancel avanga sum hloh chu Rs vbc 3.6 bawr vel niin a sawi. Kumin hian Cherry Blossom Festival chu mi sing kua chuangin an tlawh a beisei thu a sawi bawk.

Lyngdoh chuan hmun tin aṭangin sawiselna awm mah se, Meghalaya chu India ram music capital a ni tih sawiin, "Musician tam takin perform-na hun an neih tam loh avangin harsatna an tawk. Tunah hian, musician-te tan hun ṭha kan siamsak a ni. A hlawkna hi festival buatsaihtu leh musician-te bakah, festival kaltlang hian mi tam takin an tel dawn a ni," tiin, nakkum kum tir aṭangin U Soso Tham Auditorium leh Lariti hmunahte show regular taka neih ṭhin a nih tur thu a sawi.

Hei bakah hian, Garo hnamte culture leh nunphung chawisanna tur leh Goro Hill-a zinna mite hipna tura buatsaih Me.Gong festival-te, Dakti Craft buatsaih eitur, art, craft leh rimawi hmanga Meghalaya mite talent phochhuahna Winter tales Festival-te leh, Meghalaya Grassroot music project-te buatsaih a ni dawn bawk.