Assam tuilian: Mi 2 an thih belh, mi 65,000 chuangin tuilian la tuar mek

Assam state-ah tuilian avangin Thawhṭanni khan mi pahnih an thih belh. District pasarih-ah tui hi la lianin, tuilian tuartu mi 65,000 vel an la awm tih official bulletin chuan a tarlang.

Assam State Disaster Management Authority (ASDMA) in daily report a tihchhuahah, Sonitpur district-a Chariduar hmuna tuilian avangin mi pahnihin nunna an chan. State chhunga tuilian avanga nunna chan hi kuminah mi 14 an tling tawh a ni.

Chirang, Darrang, Dhemaji, Dibrugarh, Kokrajhar, Sivasagar leh Sonitpur district-ah mi 65,600 in tuilian hi an la tuar mek tih ASDMA chuan a tarlang bawk.

Dhemaji chu tui lian tuar nasa ber district niin, tuilian tuar mi 31,000 an awm a, Sivasagar chuan dawtin mi 29,300 leh Chirang-ah mi 2,200 chuang tuilian hi an la tuar mek.

Sivasagar-ah relief camp pasarih siam a ni a, mi 1,329-in awmna lailawk atan an hmang. Hei bakah hian, district parukah relief distribution centre 20 siam a ni bawk.

ASDMA tarlan danin, tun dinhmunah khaw 316 chu tuiin a chim pil tawh a, thlai chinna hectare 5,743.09-a zau chu a chhe tawh bawk.

Kamrup, Kokrajhar leh Sonitpur-ahte erosion nasa tak a thleng a, Jorhat, Sivasagar, Chirang, Sonitpur, Barpeta leh Dhemaji-ahte chuan tuilian hian lui tui danna, kawng, lei leh infrastructure-te a tichhe bawk a ni.

Dhubri, Tezpur leh Neamatighat-ah Brahmaputra lui chuan hlauhawm chin a pel tawh a, Brahmaputra-a luang lut luite pawh Road Bridge-a Beki-ah leh Nanglamuraghat-a Disang hmunahte hlauhawm chin a pel tawh bawk.