Dan loa Manipur luh tumte dang turin Ukhrul-ah police outpost thar 2 siam

Manipur-a Ukhrul district deputy commissioner Kengoo Zuringla chuan dan loa state chhung luh tumte dang tur leh, dan khap thil lak luh veng turin border police outpost thar pahnih siam mek a nih thu Thawhlehni khan a sawi.

DC Zuringla chuan border police outpost tharte hi Tusom CV-a pillar no. 139 leh 130 bulah leh, Poi khuaa pillar no. 126 leh 127 bulah siam a ni. Police outpost thar sak hna hi an thawk ṭan tawh tih sawiin hei hian dan loa lo lut tur leh dan khap thil lak luh a veng dawn a ni, a ti.

District chhunga nu naute harsatna tawh mek sukiang turin police station pasarihah women help desk siam a nih thu a sawi bawk. Police department-te chu fakin, district chhung himna turin theihtawp an chhuah tih a sawi bawk a ni.

State sorkarin ruihhlo do kawnga hma a lakna pawh sawiin, DC chuan Ukhrul district police leh district administration ṭangkawp, 6th Manipur Rifles, forest department, leh NAB-te chuan district hmun hrang hranga dan loa poppy chinna hmunte chu nikum January 1, 2022 aṭang khan tihchhiat hna ngawrh takin an thawk tih a sawi.

"Dan loa poppy chinna hmun acre 868 zet tihchhiat a ni tawh. Hemi chhung vek hian, hmun hrang hrangah brown sugar kg 90 leh opium kg 55 man ni tawh bawkin, hemi kaihhnawihah hian mi 16 man an ni tawh," a ti.

DC chuan ṭhalai hna neilote tan zu leh ruihhloa tlan mai a awlsam avangin, an thiam thilte chhawr ṭangkaia hnathawh tur ngaihtuahpui a ngai tih a sawi, training mumal tak an dawn chuan, eizawnna tlak hna an nei vat thei dawn a ni, a ti bawk.