India flag letling zawnga a pawh parh avangin Assam-a BJP President lakah FIR theh lut

Assam BJP president Bhabesh Kalita chu Thawhlehnia Independence Day lawmnaah India flag, a letling zawnga a pawh parh avangin a lakah FIR theh luh a ni.

Nagaon district-a khawsa mi pathum chuan BJP president chu India phatsanah puhin, Nagaon Sadar police station-ah Thawhlehni vek khan FIR hi an theh lut.

India flag chu a letling zawnga tar a ni tih a hriat hnu pawha pawt parh luiah Assam BJP President Kalita chu puhin, a thil tih chu ram phiarrukna a ni, an ti.

Bhabesh Kalita hian Guwahati-a BJP party state headquarter-a Independence Day lawmna neihah India flag hi a letling zawngin a pawt parh a ni.

Flag letling zawnga pawh parh a ni hi Kalita leh party hotu dangte'n an hre lawk lo tih an sawi thung a, Kalita-a'n thu a sawi zawha party worker-te'n an hrilh hriat hnuah flag hi a dik zawnga zar ṭhat leh a ni.

He thil thleng avang hian Kalita chu fimkhur tawk loah puhin mi tam takin an sawisel.

Assam BJP President chuan a thil tih avang hian thupha chawiin, flag hi a letling zawngin a awm tih a hriat loh thu a sawi.

Flag Code of India, 2022 chuan India flag hi a letling zawnga tar a khap a, a tilui chu kum thum chhung thleng lungin tantir emaw, pawisa chawitir emaw, a pahnih emawa hrem theih a ni.