Nagaland sorkarin Chumoukedima hmunah planned city din a tum

Nagaland sorkar chuan Chumoukedima district-ah planned city din a tum tih chief minister Neiphiu Rio chuan Thawhlehni khan a sawi.

Nagaland khawpui Kohima-a Independence Day lawmnaa thu a sawinaah CM Neiphiu Rio chuan he thu hi sawiin, "Urban Development Department-in state chhungah modern planned city thar siam turin hma a la mek. Ministry of Housing and Urban Affairs-ah pawh city thar sakna tur proposal hi submit a ni tawh," a ti

City thar hi Chumoukedima district-a Chatey valley-ah din tum a ni a, sq km 39 bawr vela zau a ni ang.

Chief Minister chuan, "Chatey Valley hi a awmna hmun, sik leh sa, kawngpui leh rel kawngin a paltlang a nih avang tea thlan a ni. City sakna tura NOC ṭul zawng zawngte leh tih ngai thil dang zawng zawng pawh tihfel a ni tawh," a ti.

Khaw thar din turah investment group hrang hrang chuan sorkar chu thawhpui an duh thu sawiin, an rawn dawr tawh tih Rio chuan a sawi. Khaw thar dinna tur proposal chu Ministry of Housing and Urban Affairs-ah theh luh a ni tawh a, a rang lama Ministry-in a pawm a beisei tih a sawi bawk.