CBI-in Manipur case chhuitu tur member 53 awmna team din

Central Bureau of Investigation (CBI) chuan Manipur tualchhung buaina kaihhnawih case hrang hrangte chhui turin official 53 awmna team a din.

Team din zingah hian Deputy Inspector General (DIG)-level official pathum leh Superintendent of Police rank pakhat an tel a, DIG level pathum zinga pahnih chu hmeichhia an ni.

Solicitor General Tushar Mehta chuan CBI chuan hmeichhiate laka pawikhawihna thleng chungchanga First Information Reports (FIR) 12 ziahluhte chu a chhui hmasa dawn tih Supreme Court hnenah a thlen tawh a, investigation tih mek laia hetiang case hmuhchhuah tharte pawh a bawhzui nghal zel bawk ang.

CBI official-te leh forensic expert-te chuan case paruk kaihhnawihah Manipur hi June thla khan an lo tlawh tawh a ni. Official-te chuan Pangei Police Training School, Imphal-a NG College bula Naoremthong leh Churachandpur district-a silai leh a mu ṭhahnem tak rukchhuahna hmun an tlawh bawk.

Union home minister Amit Shah-a'n Manipur a tlawh ṭuma CBI-te koh luh a ni ang, tia a puan hnuah state sorkar rawtna angin CBI chuan heng case-te hi an la ta a ni. Hei bakah hian, DIG level official-in a ho Special Investigation Team (SIT) hran din a ni bawk.