Assam-Meghalaya Regional committee-te'n Khanduli an tlawh

Assam leh Meghalaya ramri buaina chinfelna tura hmalakna kal zelah, state pahnih regional committee ve vete chuan Nilaini khan Khanduli an tlawh.

Khanduli hi Assam lama Anglong district leh Meghalaya lama West jaintia Hills district ramri hrula awm a ni.

Assam team hi water resource minister Pijush Hazarika-a'n a ho a, Meghalaya team hi deputy chief minister Sniawbhalang Dhar-a'n a ho thung.

Assam Minister Pijush Hazarika chuan, "Tun hi helai hmun kan tlawh vawi khatna a ni. State pahnih regional committee-te hi meeting nei tura lo kal kan ni. Local organization OB-te aṭangin memorandum pawh kan dawng," tiin chanchinthar lakhawmtute hnenah a sawi.

"Ramria chengte kawm turin kan lo kal leh thuai dawn. Constitutional boundary pawh kan tlawh ang. Chief Minister hnena report thehluh hmain Assam lamah nge Meghalaya lama awm an duh zawk tih kan zawt phawt dawn. Ramri ṭhen hi central subject a ni. Thawh khatnaah khan buaina 50% chu chinfel a ni tawh. A bak la awm pawh hi chinfel a ni thuai ang," a ti bawk.

Hazarika chuan, "Khasi-te hi kan unaute an ni. Intibuai tur kan ni lo. Assam-ah hian zalen taka lo lut tur an nih ang bawkin Assamese-te pawh Meghalaya-ah zalen takin an awm thei tur a ni. Inremna hi kan vawnnun reng a ngai," a ti.

State pahniha regional committee-te hian Khanduli BOP-ah meeting hi neiin, Baithalangso Rupsing Terang MLA, Chief Executive Member of Jaintia Hills Autonomous District Council (JHADC) Thombor Shiwat, Assam principal secretary of revenue and disaster management department GD Tripathi leh state pahnih aṭanga senior official-te, district commissioner-te leh member dangte an tel a ni.