ADB-in Meghalaya tan dollar mtd 40.4 loan pek a remti

Asian Development Bank (ADB) chuan Meghalaya state chu dollar maktaduai 40.4 loan puktir a remti. He loan hi naupangte hmasawnna early childhood development (ECD) leh nute rilru lam hriselna atan hman tur a ni.

Loan pek tur hi Meghalaya-in Anganwadi centre (AWC)-a naupangte'n ei leh in hrisel an neih theih nana nutrition garden siam a tum kawnga ADB-in a puihna kalzel a ni. He loan hmang hian sorkarin naupang kum 6 chinte ṭhanlenna tura an mamawh, ei leh in hrisel pek vek a tum chu an ti hlawhtling thei dawn a ni. State sorkar chuan hemi project atan hian dollar maktaduai 15.27 a tum ve bawk ang.

He project hmang hian Meghalaya-a naupang, in lama enkawl (kum 0-1.5) leh daycare (Anganwadi) centre-a enkawl (kum 1.5-6) te puih an ni thei dawn a; naupai, hnute pe lai leh naupang thla 5 aṭanga kum 6 chinte ei leh in hrisel pek an ni dawn a ni.

Meghalaya-ah hian mi maktaduai 3.3 an awm a, 70% chu lo neiha ei zawng an ni. India per capita income chu Rs 1,32,115 a nih laiin, state per capita income hi Rs 87,653 chauh a ni thung. State a cheng zinga 34% chu below poverty line (BPL) an ni. Naupang kum ruk chin mi maktaduai 0.5 an awm a, naupang kum 5 zingah ei leh in ṭha hmu lo tam tak an awm.

ADB Principal Health Specialist Dinesh Arora chuan loan pek chungchang hi sawiin, "ADB chuan Meghalaya sorkarin naupangte hmasawnna tura hma a lakna hi a thlawpin, puih a in huam. Project thar ṭha tak duan chhuah hi rampumah hman tlak a ni," a ti.

ADB-in a puih project hmang hian Aganwadi Centre 1800 tih changtlun a ni dawn a, hmun kilkhawrah sik leh sa dawl zo centre thar 600 sak a ni bawk ang.

Meghalaya-a hmun kilkhawra awm khaw 1010 chuan AWC an la nei lo. Tun dinhmunah hian Meghalaya hian AWC 6,906 a mamawh laiin, AWC 5,896 chauh a la nei thei a ni.