Kuki-Zomi MLA 10-te'n PM Modi lehkha thawn: Rs vbc 500 bakah Govt post siamsak an phut

Manipur-a Kuki-Zomi MLA 10-te chuan August 16, Nilaini khan prime minister Narendra Modi hnenah lehkha thawnin hill district panga; Churachandpur, Kangpokpi, Chandel, Tengnoupal, leh Pherzawl District-ahte Chief Secretary leh DGP emaw a tlukpui post emaw siamsak turin an phut. Hei bakah hian PM Relief Fund aṭangin Rs vbc 5000 pek an phut bawk.

PM hnena lehkha an thawnah hian Imphal-a Kuki-Zomi khawsaten harsatna nasa tak an tawh thu sawiin, "Kuki Zomi-te chenna in, lirthei leh biak-in te hal a ni a, Manipur University hostel, hostel dang leh zirna in, medical college leh nursing zirnaa Kuki-Zomi zirlaite chu an chenna aṭang tein an hnuk chhuak a, vawiin thleng hian tihduhdah, pawngsual leh thah an la tawk reng a ni.

"State Legislative Assembly member-te pawh zuah an ni lo. Thanlon Constituency-a Manipur Legislative Assembly member Vungzagin Valte leh a driver pawh Chief Minsiter Bangla an tlawh haw chu lo dangin an sawisa a ni. Driver zawk chu an vawhlum a, MLA pawh hi nasa taka sawisak niin thi turin an hnutchhiah a; security force-ten vanneihthlak taka chhan hmanin New Delhi panpui nghal a ni. Cabinet Minister pahnih Letpao Haokip leh Nemcha Kipgen-te in leh quarter pawh hal a ni," tiin an ziak.

'Imphal chu thihna leh chhiatna ruam a ni tawh'

MLA-te chief minister Biren Singh chu sawiselin, Chief Minister kaihhruaina hnuaiah Meitei-te chuan Kuki-Zo te an la bei reng tih an sawi.

Imphal Valley chu Kuki-Zo te tan chuan thihna leh chhiatna ruam a ni tawh a, tumah an let ngam tawh lo tih sawiin MLA-te chuan, "Rilru lama harsatna nei hmeichhe pakhat chu Meitei hmeichhe pawl Meirapaibis-te chuan an man a, Meitei militant-te kutah pein thah a ni. Kangza khaw tlangval David Thiek pawh rawng leh rapthlak takin Meitei helpawlin a lu an tansak bawk. Kuki-Zo hmeichhe pahnih chu saruaka tihnawmnah leh pawngsual rawn an ni. Heng thil thlengte hi ramchhung mai nilo rampawn mipui thlengin an dem a ni," tiin an ziak.

MLA-te chuan Kuki-Zo sorkar hnathawkte harsatna sukiang tur leh Kuki-Zomi te khawsakna hmuna inrelbawlna fel tak a awm theihna tur chuan Chief Secretary post emaw a tlukpui post emaw bakah, DGP emaw a tlukpui post emaw siam vat a ṭul tih an sawi a, hei bakah hian civil leh police department-ah senior level post pawimawhte siam a ṭul thu an sawi bawk.

"Kuki-Zo tribal zinga IAS (Indian Administrative Service), MCS (Manipur Civil Service), IPS (Indian Police Service) leh MPS (Manipur Police Service) officer-te pawhin Imphal-ah hian hna an thawk thei tawh lo a ni," tiin MLA-te chuan Imphal-ah sorkar hmun pawimawh zawng zawng a awm avangin hill district lamah hian parallel set-up neih ve an rawt.

Kuki Zomi MLA-te hian tualchhung buaina chhuak tuartu Kuki Zomi-te tan Prime Minister's Relief Fund aṭangin Rs vbc 500 pe turin Prime Minister chu an phut bawk.

Sorkar hnathawk 2000 chuang sawnchhuah an ni tawh

State sorkarin August 1-a Supreme Court hnena report a thehluha a lan danin, Manipur-a sorkar hnathawk 2,000 chuang chu an tana hlauhawm lo tur district-ah sawn chhuah an ni tawh. Sawn chhuah zingah hian IAS officer, driver, peon, security guard leh zirtirtute bakah, police mi leh sa pawh an tel.

Manipur High Court-ah thawktu 42 sawn an ni a, Manipur finance service-a thawktu 25, zirtirtu 389, IAS 28 leh MCS officer-te chu hmun him lamah sawn chhuah an ni bawk.

State police mi leh sa 761 chuan an post ah chhuahsan a, June 19 khan mi 687 chu an post-ah lo kir leh tawh mah se, mi 74 chu an la chawl a ni. Manipur Rifles leh Indian Reserve battalion (IRB) mi leh sa 1,092 pawhin an unit an chhuahsan a; mi 1,018 chu in report leh tawhin, mi 74 chu an chin hriat a la ni lo thung.

May 3-a tualchhung buaina chhuah aṭang khan state chhunga sorkar office leh judiciary-ahte hnam inkarah intihhranna nasa tak a thleng a ni.

SBI-in loan puktute tan ngaihhnathiamna siam

State Bank of India (SBI) chuan Manipur tualchhung buaina chhuak tuar mekte tan loan rulh chungchangah ngaihhnathiamna a siam.

SBI chuan relief package siamin, installment thla bia rulh chite, interest chawite leh installment dangte huamin, thla 12 chhung ba rulh loh a phalsak. Buaina chhuah ṭan ni, May 3 hma lama account non-performing assets (NPAs) nei hman lo te erawh a huam lo ang tih Manipur SBI regional office thuchhuah chuan a tarlang.

SBI chuan Manipur buaina chhuakin mimal leh sumdawnna nasat takin a nghawng tih an hriat thu an sawi a, relief package hi harsatna tawk mekte tizangkhai tura siam a ni, an ti.

"SBI relief package hi buaina chhuak tuar mekte tan thil lawmawm tak a ni. EMI leh interest pek ngai rih lo ringawt pawh hi loan puktute tan a hahdamthlak bakah, nungphung leh sumdawnna pangngai taka an kalpui leh theih nan a pui dawn a ni," tiin SBI official chuan a sawi.