Amit Shah thusawi duh loin Manipur zirlai pawlte'n kawng zawh

Manipur zirlai pawl inzawm khawm, Manipur’s Joint Students’ Body (JSB) chuan union minister Amit Shah-a'n Manipur-a buaina chhuah chhan chu Myanmar aṭanga dan loa lutte vang a ni tia Parliament-a a sawi chu an duh lohzia lantirin, kar liam ta Inrinni khan Churachandpur-ah kawng an zawh.

Zomi Students Federation (ZSF), Kuki Students Organisation (KSO) leh Hmar Students Association (HSA)-te telna JSB chuan Home Minister chu a thil sawi chungchangah insawi fiah turin an phut.

Amit Shah hian August 9 khan Parliament-ah Manipur tualchung buaina inṭanna chu ram ṭhenawm Myanmar aṭanga Kuki raltlante vang a ni, tiin a sawi.

Shah chuan Kuki raltlante chu Manipur valley ramhnuaiah an inbengbel a, hei hian Manipur valley-a awmte zingah ram inchhuhsak hlauhna a thlen tih a sawi. Raltlante khawsakna hmun hi khuaa puan tura tih thuthang a awm aṭangin buaina hi a inmung chho ṭan a ni, a ti bawk.

Home Minister thusawi bakah hian, sorkar laipui leh Manipur sorkar aiawha ding, India Solicitor General Tushar Mehta-a'n August 1-a Supreme Court-ah RIMS leh JNIMS mitthi dahna hmuna ruang lak loh tam zawk chu dan loa lutte ruang an ni tia a sawi avangin an lungawi loh thu zirlai pawlte hian an sawi bawk.

"Kuki-Zo tribal-te chuan hei hi an la thutak hle a, solicitor general hi a thusawi finfiahna kan phut a ni," tiin JSB chuan an sawi.

Lungawi lohna lantira kawngzawh zirlai pawlte chuan, Kuki-Zo tribal hotute leh mithiamte laka FIR theh luh chu an ka hupbeh tumna a ni, an ti bawk.

Kawngzawh hi Lamka public ground aṭangin an ṭan a, Tipaimukh Road, IB Road leh Tedim Road-ahte zawhin, Wall of Remembrance-ah hun tawp an hmang a ni.