APPSC paper leak chungchang chhui turin panel din

Arunachal Pradesh Public Service Commission (APPSC)-in hna lakna tura exam chi hrang hrang a buatsaiha question paper put ru chhui chiang turin, Arunachal Pradesh sorkar chuan commission a din.

APPSC-in exam a buatsaih ṭhenkhatah question paper put ru a awm avangin hna lakte chu a fair tawk lo tia puhna a awm avangin commission hi din a ni. Justice hlui PK Deka-a hona hnuaiah commission chuan, APPSC-in April 2014-August 2022 chhunga exam a buatsaiha question paper put ru nia sawite a chhui ang.

Chief secretary Dharmendra chuan panel dinna tur thupek hi kar liam ta Nilaini khan tichhuakin, question paper put rua puh chungchanga thudik hai lang tur leh hemi hun chhunga APPSC-a thil felhlel awmte chhui chiang turin commission chu din a ni tih a sawi.

Hei bakah hian official, officer leh hna zawng laite zingah hna laknaa dik lo taka inhnamhnawihna nei an awm leh awm loh a chhui dawn bawk, tiin order chuan a tarlang.

Commission chuan thil felhlel awm a chhui chhuah bakah, nakina hna lak awm leh zel turah langtlang leh thlei bik nei loa kalpui a nih theihna turin thurawn a siam bawk ang. Hei bakah hian, investigation an kalpui laia thil dik lo dang an hmu chhuak a nih chuan, enfiah leh siam ṭhat hna an thawk tel bawk ang.

APPSC chu a ṭul ang anga commision hi puibawm tura hriattir a ni tawh a, commission hi thla thum chhungin report kimchang submit hman tura beisei a ni.

Nikuma APPSC-in assistant engineer (civil) examination a buatsaiha exam zinga pakhat, Gyamar Padung-a'n exam paper a put rua ringhlelin August 20, 2022 khan police-ah complain a theh luh hnuah case hian ngaihven a hlawh zui hle.

He case hi capital police-te'n an chhui hmasak phawt hnuah, Special Investigation Cell (SIC)-ah thawn ni lehin, chumi hnuah CBI hnenah pek chhawn a ni leh a ni. Hemi case kaihhnawihah hian mi 46 man an ni tawh a, man zingah hian sorkar official leh sorkar hnathawk 39 an tel.