Assam sorkar-in College zirtirtute tan dress code siam

Assam sorkar chuan college zirtirtute inthuam dan tur, dress code siamsakin, college-ah thawmhnaw rawng lar tak tak ha lo tur te, zahawm taka inchei tur leh, casual leh party dress-te ha lo turin thuchhuah a siam.

Assam higher education department chuan kar liam ta Zirtawpni khan thuchhuah hi tichhuakin, zirtirtu ṭhenkhat zingah pawna hak chhuah chi awm lo tak inbel an awm ṭhin avangin dress code hi siam a ni tih a tarlang. Zirtirtute chu an hnathawhna hmuna an incheina kawngah pawh zahawm tak, midangte entawn tlaka awm tur an ni, a ti.

Thuchhuahin a tarlan danin, zirtirtu mipate chu formal kamis leh kekawr, dhoti-pyjama emaw traditional attire emaw an ha tur a ni. Zirtirtu hmeichhiate chuan salwar suit, saree emaw mekhela chador emaw an ha tur a ni a, T-shirt, jeans leh leggings-te an ha tur a ni lo.

Zirtirtu hmeichhia leh mipate chu fai tak leh zahawm taka inchei tura tih an nih bakah, kawr rawng lar leh awmhmun kawr leh party wear-te chu an inbel khap a ni.

Dress code zawm lote chungah disciplinary action lak theih a nih thu thuchhuahah hian tarlan a ni bawk.

Assam sorkarin college zirtirtute tana dress code a siam chungchangah hian ngaihdan a inṭhen nasa hle. Ṭhenkhatin classroom-ah zirtirtute a tizahawm sawt dawn tia an sawi laiin, ṭhenkhat chuan an zalenna rahbehna a ni, an ti thung.

Sorkar chuan dress code siam chu awm dan mawi leh hna tihzahawmtu atan a pawimawh tih sawiin, dress code hi hman ṭan nghal tur a nih thu a sawi.

Assam sorkar chuan kumin May thla khan school zirtirtute tan dress code a lo siam tawh bawk a ni.