Meghalaya-ah oil palm chin tumna a awm lo : Minister Ampareen Lyngdoh

Meghalaya agriculture minister Ampareen Lyngdoh chuan mipuiin an duh loh avangin Meghalaya sorkar chuan an state-ah oil palm chin a tum lo tih a sawi.

Minister Lyngdoh chuan Meghalaya sorkar chuan loneitute thar hmanga thil siam leh hralh chhuah lamah a pui zawk dawn, a ti.

"Tun dinhmunah chuan oil palm chin tumna a awm rih lo. Kum 2021 leh 2022-a Assembly-a sawihonaah pawh khan dodalna nasa tak a awm a ni. Meghalaya-ah oil palm hi chin tur nge chin loh tur tiin sawihona neih a ni a, tun sorkarah hi chuan oil palm chin hi kalpui a nih ka ring lo," tiin Lyngdoh chuan a sawi.

Meghalaya sorkar kum nga term hi kumin March khan a inṭan chiah a ni.

Sorkar chuan private company-te nena ṭangkawpin loneitute thar chhuah hmanga processed food siam lamah hma a la dawn tih sawiin Minister chuan loneitute chu processing lama hma la turin buatsaih mek an ni a, process food atana hman tur Lakhuihthei tih ro dan pawh zirtir an ni, a ti.

Loneitute chu cluster, self help group leh cooperative-te siamin mahnia an din theih hma chu sorkarin a pui dawn tih a sawi bawk.

Sorkar laipui chuan National Mission on Edible Oils – Oil Palm (NMEOOP) hnuaiah kum 2021-a ram hectare nuai 3.5-a oil palm chin chu kum 2025-26 hmain ram hectare nuai 6.5-ah zauh a tum a, oil palm chin belhna hmun atan hmarchhak state leh Andaman and Nicobar Island-te a ruahman a ni.

Mizoram chu hmarchhak state zinga oil palm chin remti hmasa ber niin, kum 15 liam ta aṭang khan oil palm chin a ni tawh. Hmarchhak state dang Assam, Meghalaya, Nagaland leh Tripura-te pawhin sorkar ruahmanna hnuaiah loneitute nen contract siam theihna turin Godrej Agrovet leh Patanjali Foods-te nen inremna an ziak tawh bawk.