Manipur : Tribal-te'n Kangkokpi-ah kawngpui dang leh

Manipur-a tribal pawl chuan hill area-a cheng, Kuki-Zo hnamte mamawh pek luh phutin, nimin aṭang khan tiam chin awm loin Kangkokpi district-a national highway pahnihte an dang leh.

Committee on Tribal Unity (COTU) Sadar Hills Kangpokpi chuan Manipur khawpui, Imphal leh Dimapur, Nagaland inkalpawhna NH2 leh, Imphal-Silchar inkalpawhna NH7-te an dang a ni. COTU hian an thil phut chungchangah, Kangkokpi DC kaltlangin Prime Minister hnenah memoradum an theh lut bawk a ni.

Hill area-a cheng, tribal-te mamawh thawn luh turte chu Meitei-te'n an lo dang ṭhin nia sawi a ni. August 18 pawh khan Kongkokpi leh Senapati district-a damdawi leh damdawi hmanraw thawn luh phurtu, vaccine van chu Meitei pawl, Meira Paibis-te'n Sekmai-ah lo dangin, a thil phurhte an tichhe vek niin an sawi.

Tribal pawl dang, Kuki Zo Defence Force pawhin Kuki-Zo chenna biala mipuite mamawh hmanrua leh damdawite pek luh an nih loh chuan, August 26 aṭangin kawngpui dan an tum tih an sawi ve bawk.

Imphal-Silchar kawng min vangin truck 500 chuang an tang

Imphal-Silchar kawngah Pathianni khan lei a min thar leh a, lirthei ṭhahnem tak an tang. Leiminna hmun hi Manipur-a Noney district-a Rangkhul leh Langkhul Khullel khaw karah a ni. Leimin hi Inrinni zan khan thenfai a ni a, mahse, a tukah a min nawn leh a ni.

Leimin avang hian bungraw phur truck 500 chuang zet an tang mek a ni. August 15 khan leimin avang bawkin ni 4 chhung lirthei an lo tang tawh a, August 19 zanlaiah kawng hi a tlang leh chauh a ni.

Kawngpui thenfai hna hi thawh nghal niin, Noney district administration chuan an vil a, NHIDCL-in kawngpui thenfai hna hi an thawk thung.

Noney, Jiribam leh Tamenglong district-ahte ruah a sur nasat avangin thingkung tam tak a tluk bakah, power supple a tikhaihlak nasa hle. Met Department chuan August 26 thleng khua cheng turin a sawi lawk a ni.