NHAI leh Assam sorkarin thing phun turin inremna siam

National Highways Authority of India (NHAI) leh Assam sorkara Environment and Forest Department chuan state chhunga kawngpui hrulah ram ngaw zauh turin kar liam ta Inrinni khan inremna an ziak.

Memorandum of Understanding (MoU) hi Additional Chief Secretary (Forest) Ravi Shankar Prasad leh National Highways Authority of India (NHAI) Joint Advisor Bikash Brahma-te'n an ziak a ni.

MoU-a a inziah danin, thawh khatnaah hian division pali-Bongaigaon, Nalbari, Nagaon leh Barpeta-te tuam phawt tum a ni a, forest department social forestry division chuan kawngpui hrul leh lane inkarah thingphun hna hi an thawk ang.

State chhunga ram ngaw zauh chuan carbon footprint a tihtlem bakah, lirtheia veivah a tihnawm dawn avangin inremna hi ziah a ni, tiin MoU chuan a tarlang.

Forest minister Chandra Mohan Patowary chuan green highway siam tuma an hmalakna chu NHAI nena an inremna hmang hian tihhlawhtlin theih a ni dawn tih sawiin, social forestry division-te chu Assam sik leh sa ngeih tualchhung thingkungte phun turin a chah.