Nagaland-ah mit na hri leng avangin district 3-ah school khar

Nagaland-ah mit na hri (conjuctivitis) vei an pun zel avangin district pathumah kar khat chhung school khar a ni.

Hri len zualna hmun hi Dimapur, Chumoukedima leh Nuiland district-te an ni a, school hi August 26 thleng khar a ni ang.

National Programme for Control of Blindness & Visual Impairment (NPCBVI) doctor Hoito Sema-a sawi danin, Assam Rifles mi leh sa pakhat, an khua, Phek district-a chawlh hmanga lo haw chu mit na hri vei report an dawn hmasa ber a ni.

Dimapur-ah hian mit na hri vei an tam ber a, case 721 an nei mek. Kohima-in dawtin case 198 neiin, Mokokchung-ah case 87 a awm bawk.

District hospital hrang hrangin report an theh luh hnuah, case neih zat hi a pun belh rin a ni.

Chumoukedima, Dimapur leh Niuland-ah te school khar tura thupek hi deputy commissioner-te'n a hrang veka tichhuakin; naupang zingah conjuctivitis case a pun zel avangin, Health Department leh School Education Department official-te nen sawiho a nih hnuah, hri leng zel tur ven nan school khar rih tura thuthlukna siam a ni, tiin thuchhuah an siam.

Mahse DC-te chuan school enkawltute chu school khar chhunga online class kalpui dan tur ngaihtuah turin an hriattir nghal a ni.

Principal Director of School Education Thavaseelan K chuan department ang chuan state pum huap anga thuchhuah siam a ni dawn lo a, mahse, district dinhmun azirin DC-te chu class suspend turin thuneihna pek an nih thu a sawi.

School khar hian hri leng darh zel tur a ven a beisei thu leh, conjuctivitis hi hunbi neia leng ṭhin a nih avangin fur a reh chuan, hri lengin ziaawm lam a pan mai a beisei thu a sawi bawk.

Hetih lai hian, All Nagaland Private Schools' Association (ANPSA) erawh chuan, school-ah buaithlak khawpa tam case a awm lo tia sawiin, Dimapur administration chu school khar tura thupek chu sut leh turin an ngen thung.