Manipur panel-in SC-ah report 3 theh lut

Judge chawl tawh pathum awmna, all-women panel on Manipur chuan Manipur-a buaina chhuak tuarte zángnadawmna pek dan, mental healthcare leh chhawmdawlna kalpui dan an zir chianna aṭangin, Thawhṭanni khan Supreme Court-ah report pathum an theh lut.

All-women panel hi August 7-a Supreme Court thupek anga din a ni a, Jammu and Kashmir High Court chief justice hlui, Gita Mitalla-in a ho a, member dang pahnihte chu Bombay High Court judge hlui, justice Shalini Joshi leh Delhi High Court judge hlui, justice Asha Menon-te an ni.

Justice Mittal committee-in report a theh luhah hian, a hmasa berah Manipur mipuite'n buaina chhuak avanga an thil hloh leh chan hrang hrangte sawiin, document pawimawh an chante siamsak leh thuai a ṭul thu an tarlang. Chenna in hal leh tihchhiat avanga identity paper pawimawh, Aadhaar leh thildang pawimawhte a chhiat thu sawiin, heng document-te siam ṭhatsak tura nodal officer ruat thuai a ṭul thu an sawi.

Report pahnihnaah hian harsatna tawkte hnena zangnadawmna pek dan, compensation scheme siam ṭhat a ṭul thu an sawi bawk. Tuna ruahmanna an kalpui hnuaiah chuan, scheme dang hmanga hamṭhatna dawngte chu telh an ni lo tih an sawi bawk. Hei vang hian Supreme Court-in a pawm, National Legal Services Authority compensation policy zulzuia scheme hi siam ṭhat a ngai a ni, an ti.

A pathumnaah hian panel-in hna an thawh theihna tura domain expert ruat a ṭul thu an tarlang bawk.