Priyanka Gandhi-i'n Manipur leh Tripura tlawh tum

Congress party hruaitu, Priyanka Gandhi Vadra chuan Manipur leh Tripura tlawh thuai a tum tih Tripura Congress hruaitu chuan Thawhṭanni khan a sawi.

Tripura-a Congress MLA Sudip Roy Barman chuan state pahnihte tlawh a tum chungchangah Gandhi-i ngei nen pawh an inbe tawh tih a sawi a ni.

"Kan hotu Priyanka Gandhi Vadra pawh ka be tawh a, Manipur leh Tripura tlawh thuai turin a in ruahman," tiin Roy Barman chuan Tripura Congress headquarters-ah media mite a hrilh. Tripura-a a cham chhung hian, Gomati district-a Tripureswari temple a tlawh dawn tih a sawi bawk.

Roy Barman hi Congress Working Committee (CWC)-ah permanent invitee angin lak luh a ni a, Tripura Congress hruaitu zinga Congress party roreltu sang CWC-a lak luh hmasa ber a ni.

"CWC-a telh ka ni hi mimal hlawhtlinna mai bakah, rim tak leh huaisen taka lo thawk tawh ṭhin hmarchhaka Congress hruaitu zawng zawngte hlawhtlinna a ni," tiin Roy Barman chuan a sawi.

Roy Barman chuan Congress an chak loh apiangin rampumin hun harsa tak a tawng ziah ṭhin tia sawiin, "Congress a din chhuah leh theih nana mipuite lo pen chhuak turin ka ngen a che u," a ti.