Ramri chungchangah Assam leh Meghalaya inbe leh dawn

Assam leh Meghalaya-a regional committee-te chu ramri buaina hmun Langpih an tlawh hmain August 26 hian Shillong-ah an ṭhu khawm dawn tih Meghalaya Social Welfare Minister Paul Lyngdoh chuan Thawhṭanni khan a sawi. Lyngdoh hian Meghalaya-a regional committee pathum zinga pakhat chu a ho a ni.

Lyngdoh chuan, "Ramri buaina hmun tlawh leh khaw mipuite kawm tura inbuatsaihna kal zelah, committee pahnihte chu Shillong-ah August 26 hian meeting an nei dawn," tiin chanchinthar lakhawmtute a hrilh.

Guwahati-a meeting an neih hnuhnung berah khan, regional committee-te chuan Meghalaya West Khasi Hills district-a Langpih hmun hi ramri chungchanga thuthlukna siam a nih hmain, ramri hrula khawsa mipuite leh an aiawhte kawm tura helai hmun tlawh dun an lo rel tawh a ni.

Meghalaya leh Assam chuan Langpih hmun hi an ram chinah an chhiar ve ve a, kum 2010 khan helai hmunah hian buaina nasa tak chhuakin, mi pali lai kah hlum an ni.

Lyngdoh chuan ramri buaina chinfel dan tur an buaipuinaah, Assam regional committe pawhin buaina nei lo khuate leh Meghalaya lama beh duh zawk khaw mipuite chu Meghalaya lamah beh phal an remtih thu an sawi tawh a ni, a ti.

State pahnihte hian nikum March thla khan ramri buaina an neihna hmun 12 zinga hmun parukah inremna an lo ziak tawh a ni.