Meghalaya-ah mit na hri kai an pung zel

Nagaland-ah mit na hri leng avangin district pathumah school khar a ni tawh a, Meghalaya state-ah pawh mit na hri kai hi an pung chak hle a, medical authority chuan mipuite fimkhur turin a chah.

Mit na hri, inkaichhawn awl tak, 'pink eye' kai report hi East Khasi Hills district-ah mi 1,324 an awm tawh a, heng zinga mi 120 chu August thla chhunga kai an ni.

August 21 thleng khan mit nâ hri kai hi West Garo Hills district-ah mi 333, West Jainta Hills district-ah 155, Ri-Bhoi district-ah 73, West Khasi Hills district-ah 47, South Garo Hills district-ah 36 leh East Garo Hills district-ah mi pariat an awm tawh.

Ri-Bhoi district-ah hian mit nâ hri leng avang hian school eng emaw zat chu an khar tawh bawk a ni.

East Khasi Hills district medical health officer, Dr. Adreena Lyngdoh chuan zirna in hrang hrangte chu fimkhur tura chah an ni tih a sawi. 'Pink eye' hri kaite hi an mit a senin a vung tel a, mittui a tlak reng bakah, mitmu a nain a thak a, khaw enga men a tiharsa hle a ni. Lyngdoh chuan ni 5 hnuah an mit na hi a ziaawm mai loh chuan doctor rawn thuai turin a chah bawk. He hri laka invenna turin mipuite chu an kut silfai ṭha reng tura chahin, midang nena hmanruate inhman ṭawm mai lo tur te, an mit khawih lo tur leh, contact lens vuah lo turin a chah a ni.