Manipur : Governor-in August 29-ah monsoon session a ko

Manipur governor Anusuiya Uikey chuan Thawhlehni khan 12th Manipur Legislative Assembly session vawi 4-na chu August 29-a neih turin a ko.

"Constitution of India hnuaia Article 174 Clause (1)-in thuneihna a pek angin, Governor Anusuiya Uikey chuan 12th Manipur Legislative Assembly session vawi 4-na chu August 29 hian Assembly Hall-a neih turin a ko a ni," tiin Assembly kohna order tihchhuah a ni.

Monsoon session hi chawhma dar 11-ah ṭan a ni ang.

State cabinet chuan a hmain monsoon session hi August 21-a ko turin Governor hnenah rawtna a lo thlen tawh a, mahse, Governor hian session neih rem tihna a pek loh avangin an nei thei ta lo a ni.

Assembly session hnuhnung ber hi May 3-a tualchhung buaina chhuah hma thla hnih, March 3 khan neih zawh a ni.

Tualchhung buaina chhuak mek karah, Valley district lama CSO-te chuan state-in harsatna a tawh mek chungchang ngaihtuah hoa special session neih hi vawi tam an lo rawt tawh a ni. Congress party phei chuan Manipur buaina ngaihsak loah Central leh state sorkar puhin, special session neih hi an phut na hle.

Manipur-a tribal pawl inzawm khawm Indigenous Tribal Leaders’ Forum chuan Kuki-Zo MLA 10-te chu Assembly special session-a tel ve lo turin thurawn an pe thung.