Shillong khawpuia tui tlan enfiah dawn

Meghalaya state mipuiin an tui tlan a thianghlim tawk lo nia an ngaih avang leh complaint lut a awm avangin, Federation of Khasi Jaintia and Garo People (FKJGP) chuan Thawhlehni khan Shillong khaw chhunga hmun 51-a tui sample chu endik turin an la.

Sample lak khawm hi zing dar 8 aṭanga ṭan a ni a, Shillong-a State Food Testing Laboratory, Pasteur Institute-ah FKJGP pawl member-te chuan tui sample hi an keng khawm a ni.

FKJGP president Dundee Khongsit chuan an thiltih chu khawtlang tlan tur tui pek chhuah chu a him tawk leh tawk loh hriatna tura ti an ni tih media mite a hrilh.

"Veng hrang hrang aṭangin sample pahnih zel lak a ni a, sample pakhat chu bacteria a awm leh awm loh enna tur niin, a pahnihna chu heavy metal a awm nge awm lo enna tur a ni. Result hi ni 15 hnuah a hriat theih ang. Result kan hriat hnuah, a positive a nih chuan a ṭha a ni mai a, mipui hnenah kan puangzar ang. Result a negative a nih thung chuan siam ṭha turin sorkar kan nawr ang," tiin Khongsit chuan a sawi. Sorkarin a ngaihsak lo a nih chuan hma la turin kan nawr zui ang, a ti bawk.

Khongsit chuan "Water sample result-te hi a nagative a nih chuan, kan tum ber chu mipuiin tui in tur thianghlim leh hrisel an neih theihna tura sorkar nawr a ni. Tu mah mawh puh kan tum lo. Kan duh ber chu thuneitute chu mipui himna tura an thawhho hi a ni," a ti