Hmarchhak state special provision khawih danglam a ni lo ang : Sorkar laipui

Sorkar laipui chuan hmarchak state-te tana special provision siam chu engti kawng zawng maha khawih danglam a tum lo tih Solicitor General Tushar Mehta chuan Nilaini khan Supreme Court-ah sawiin, chutiang hlauhthawnna siam tumna awm zawng zawng chu a dodal tih a sawi.

Chief Justice of India, DY Chandrachud-a'n a ho judge panga ṭhutna constitution bench-ah ukil Manish Tewari-a'n Jammu and Kashmir special status pekna, Article 370 paih a nih ang chiah hian, hmarchhak state tana special provision siam pawh hi tih danglam ve mai hlauhthawnna a awm tia a sawi chu Solicitor General hian a chhang a ni. "He thil hi sawi chhuak tura tih ka ni. Hei hi mipui hruai dik loh tumna a ni thei. Hlauhthawnna tur a awm loh bakah hlauhthawnna siam a ṭul lo.

"Temporary leh permanent provision kan hriat hran a ngai. Central sorkar hian North East leh hmun danga special provision-te hi tihdanglam tumna a nei lo," tiin a sawi.

"India inkaihhruaina siam danglam tum ni-a hlauhthawnna chhete awm pawhin nghawng thui tak a nei thei. He Court-in a buaipui mek Manipur chungchangah pawh a chiang reng," tiin a sawi bawk.

Congress leader leh Lok Sabha MP ni bawk, Manish Tewari hian Article 370 paih chungchang khin letna petition, Supreme Court-a theh luttu Arunachal Pradesh MLA hlui Padi Richo a dinsak a ni. Tewari chuan petition theh luttu hian tun dinhmuna central sorkar chetzia ringawt ni loin, thil thleng thei thui takin a thlir lawk a ni, a ti. Jammu and Kashmir tana Article 370 siam a nih ang chiah hian, north east tan special provision hi India danpui sixth schedule hnuaiah siam nih thu a sawi.

Chief justice bakah, Justice Surya Kant, Sanjiv Khanna, BR Gavai leh Surya Kant-te ṭhutna bench chuan thil thleng thei thlirlawkna leh hlauhthawnna ringawt chu Court-in a ngaihtuah dawn lo, an ti thung.