AP Chief Minister hlui Gegong Apang-a'n party thar din

Arunachal Pradesh chief minister hlui, Gegong Apang chuan regional party thar Arunachal Democratic Party (ADP) a din. ADP party hian nakkum state Assembly inthlan chuh an tum

Party thar puan chhuahna hun hi Thawhṭanni khan Itanagar khawpuiah neih a ni. Apang chuan thu sawiin, "ADP din chhan ber chu state hmasawnna atan a ni. Hemi kawngah hian theihtawpin hma a la ang. State-ah eirukna umboin, ṭhalaite tana hna siam leh dan leh thupek kenkawh kawnga harsatna sukiang turin hna a thawk ang," tiin a sawi.

Chief Minister hlui chuan an party thar chu kum 2024 assembly election-a thlan tlin a nih chuan, hun rei tak chhung state mipuiin an lo nawr tawh, 6th schedule hnuaia state awmtir chu tihhlawhtlin a tiam.ADP party hian state chhunga assembly seat awm zawng zawng 60 chu chuh vek a tum tih a sawi bawk.

Apang chuan an state chu thuneitu sanga innghat ṭhinna kalpungin a run mek tih sawiin, hmasawnna hna thawk tura national party-tea innghah ngai ṭhin lakah hian tal chhuah a duh thu a sawi. Ṭhalaite hmasawnna tur leh state ṭhan lenna tura hna thawh chu a tum ber a ni dawn tih a sawi.

ADP chu regional party chak tak, Arunachal Pradesh thar dintu tur a ni tih sawiin, mipui, a bikin ṭhalaite chu Arunachal Pradesh-ah danglamna thlen tura an party zawm turin a sawm a ni.

Gegong Apang hian January 1980 - January 1999 chhung leh August 2003-April 2007 chhung khan Arunachal Pradesh chief minister term sarih a lo chelh tawh a ni. Kum 2016 hma lam khan Indian National Congress member niin, chumi hnuah Janata Dal (Secular) party a zawm leh.