Amit Shah leh Manipur CM-ten meeting nei

Union home minister Amit Shah chuan Manipur chief minister N Biren Singh chu New Delhi-ah koin, Ningani khan meeting an nei.

August 29-a Manipur assembly session neih a nih dawn avangin, session neih hmaa meeting nei tur hian Amit Shah chuan Manipur CM hi a ko a ni. CM hi a minister ṭhenkhatin an ṭawiawm bawk.

Chief Minister chuan Amit Shah hnenah an state dinhmunte a hrilh a ni. An state-a boruak ṭha a awm theihna atana hma an lak dan hrang hrangte a sawilang bawk. Singh hian tualchhung buaina chhuak avanga in leh lo tam tak chhiate dinthar lehna turin, sorkar laipui chu Rs vbc 150-200 pek belh leh tura a ngen thu a sawi. Sorkar laipui hian a hmain chhawmdawl hna thawhna turin Rs vbc 100 a lo pe tawh a ni.

Manipur sssembly session neih turah hian eptu pawl, a bikin Congress chuan Biren Singh kaihhruai BJP sorkar chu state chhunga buaina chhuak mek chungchangah na taka a beih rin a ni. Hetih lai hian Kuki MLA 20-te chuan buaina a la chhuah chhunzawm reng avangin assembly session-ah an tel theih loh tur thu an sawi a, Naga MLA-te pawhin Manipur sorkar chuan Naga peace talk neih chu a tibahhlah sak avangin session hi tel an tum lo tih an sawi bawk.

CM Biren Singh chuan August 24, Nilaini khan sorkar laipui leh state sorkar chuan Manipur tualchhung buaina chhuak tihrehna tur political solution zawngin hma a la mek tih a sawi. Manipur-a remna leh nunphung pangngai a awm leh theihna turin inbiakremna neih a ni thuai dawn tih sawiin, "Manipur sorkar chuan state a ralmuan lehna turin theihtawp a chhuah reng a ni," a ti.

Manipur tualchhung buaina hian thla li chuang a awh tawh a, May 3-a Kuki leh Meitei inkara buaina nasa tak chhuak chu tun thlengin a la reh lo. Mi 150 chuangin nunna chan tawhin, mi sang chuangin an in leh lo an chan a ni.