New Delhi-ah Naga Peace talk chhunzawm

Sorkar laipui leh National Socialist Council of Nagaland - Isak Muivah (NSCN-IM) chuan August 23 khan New Delhi-ah Naga peace talk an nei leh ṭan a, nimin khan inbiakna hi an chhunzawm.

Tun ṭum inbiaknaah hian Naga flag chungchang chu an ngaihtuah pui ber tur a ni.

Sorkar laipui leh NSCN(IM) hi inremna kawng zawngin hun rei tak an inbe tawh a, kum 2015, August 3 khan Framework Agreement pawh an lo ziak tawh a ni. Mahse NSCN (IM) lamin Naga flag leh constitution hran an phutna chu sorkar laipui lamin a remtih theih loh avangin inremna tluantling an la siam thei lo a, hei hi tun ṭum an inbiaknaah pawh ngaihtuah ṭha leh ang.

Inbiaknaah hian NSCM lam hi Atil Kilonser leh Thuingaleng Muivah-ten an ho a, sorkar laipui aiawhte hi AK Mishra-a'n a ho thung.

Kumin August 14-a Naga Independence Day an hmannaah, NSCN(IM) hotu Muivah chuan flag leh constitution chu Naga mipuite nena ṭhenhran theih loh a ni tiin, sawibuai thei a ni lo a, hei hi India sorkar hotute pawhin an hriatthiam a ngai a ni, tiin a sawi.