Meghalaya : Umiam lui thianfai turin robotic boat hmang dawn

Meghalaya sorkar chuan Umiam luia pastic paihluhte chu Artificial Intelligence(AI) rinchhan khalhtu ngai lo, robot lawng 'ClearBot' an thenfai tir dawn tih sorkar official chuan Pathianni khan a sawi.

Health secretary Ram Kumar chuan Meghalaya khawpui, Shillong-a luanglut Umkhrah leh Umshyrpi luiin nitin plastic ṭhahnem tak an luan luh pui chu Umiam lui chhim lamah hian a inchhek khawl ṭeuh tih a sawi a, helai hmunah hian lawngleng bak a kal thei lo, a ti bawk.

"ClearBot hnathawh dan tur enlawkna neih chuan kan lung a ti awi a, a hautak lo thei ang berin tui an tifai thei dawn a ni," tiin Health Secretary chuan a sawi.

Hongkong-based company ClearBot chuan kar liam ta lamah khan enchhinna hi neiin, session khatah bawlhhlawh kg 200 a thian a ni.

ClearBot company hi Smart Village Movement-in thawhpui tura an shortlist company zinga mi a ni a, state sorkar nen project dangah pawh an lo thawkdun tawh ṭhin.

ClearBot co-founder Siddhant chuan Umiam lui chu lui bal bera zinga mi a ni tih sawiin, "Tifai tura min thlang a nih chuan, thla rei lote chhunga kan lawngin lui a tifai thei dawn a ni," a ti. "Tuna kan lawngleng hman hi a te chi niin ni khatah bawlhhlawh kg 200-400 inkar a phur thei a, lawng lian zawk hman a nih chuan thla reilo te chhungin a thian zo thei dawn a ni," tih a sawi.

Mawdun khuaa sangha mana eizawngte chuan lui tihfai tum a ni chu lawmawm an tih thu sawiin, "Bawlhhlawh vang hian sangha man a harsa hle. Khawl hian a thianfai tak tak thei dawn tih ka hmu," tiin sangha mantu pakhat, W Lyngdoh chuan a sawi.

ClearBot lawngleng ṭhenkhat chu Varanasi leh Bengaluru-ah lui thenfai nan hman mek an ni.