Manipur Police-in ralthuam ṭhahnem tak hmu let

Manipur-a security force-te chuan district panga; Imphal-East, Imphal-West, Kakching, Thoubal, Kangpokpi leh Bishnupur district-ahte ralthuam dap beihpui thlakin silai 16, silai mu 70 leh puak thei thil 16 an hmu tih Manipur police-te chuan an sawi.

"Darkar 24 liam ta chhung khan state boruak chu a rit hle a, silai kah zeuh zeuh a nih bakah, lungawi loa nuar an awm nual a ni," tiin Manipur Police chuan kar liam ta Inrinnia press release an siamah an tarlang.

Security force-te chuan Hill leh Valley-a district hrang hrangah checkpoint 127 siamin, lirthei veivakte an enfiah a ni. Hei bakah hian, state chhunga hmun hrang hrangah ralthuam kawl kaihhnawih leh dan zawm lo mi 2,257 man ni bawk.

Press release-in a tarlan danin, NH 37-ah nitin mamawh phur lirthei 153 chu tlan tlang tir an ni. Buaina chhuah theihna hmun zawng zawngah security tihkhauh a ni a, lirtheite him leh tluang taka an tlan theihna turin hmun ralṭi zual laiah security convoy dah a ni.

State chhung hmun ṭhenkhatah curfew thlahdul niin, Imphal West, Imphal East, leh Bishnupur district-ah te chuan zing dar 5 aṭanga tlai dar 6 chhung curfew thlahdul a ni. Hill district-a hmun rukah curfew puan a ni lo thung.

May 3-a tualchhung buaina chhuah aṭang khan, mipuiin police station leh ralthuam dahna hmunte luhchhuahin ralthuam sing 4 chuang leh silai mu nuai 5 chuang rukbo a ni tawh.

Police leh security force-te chuan ralthuam rukbo te hi hmuh let tumin hma an la reng a, hmun hrang hrang aṭangin silai 1,100 leh silaimu 15,000 an hmu let tawh. Ralthuam hmuhlet tam zawk hi valley district aṭanga an hmuh a ni.