Tripura : Roman script hman ngiatin TSF-in shutdown neih tum

Tripura-a Twipra Students’ Federation (TSF) chuan vawiin hian state chhung hmun hrang hrangah darkar 12 awh shutdown neih a ni dawn tih an puang.

Kokborok ṭawnga Roman script hman phutin TSF chuan shutdown hi an puang a ni.

Tripura zirlai pawl hian India danpui hnuaia Article 125 chu siamṭhat an phut bawk.

Darkar 12 awh shutdown hi zing dar 6-ah ṭan tur niin Hatai Kotor, Hezamara, Bishramganj, Manughat leh Champaknagar hmunahte neih a ni ang.

TSF chuan shutdown neih tur hi 'people's movement' tia sawiin, shutdown hlawhtling tak neih a nih theih nan an hmalakna chu thlawp turin mipuite an ngen.

Kokborok ṭawng hi state official language niin, state chhungah tribal community 19-in an hmang mek. Mahse he ṭawng hian script a nei lo a ni.

Hemi chungchanga a lungawi lohna sawiin TSF leader chuan, Kokborok ṭawnga Roman script hmang tura ngenna, memorandum chu thla hnih liam ta khan state sorkarah thehluh a ni tawh thu leh, tun thlenga sorkar chhanna an la nghah mek thu a sawi.