Manipur sorkarin tribal district-ah nitin mamawh la lut

Manipur sorkar chuan army leh security force-te nen ṭangkawpin nimin, August 28 aṭang khan Churachandpur hill district-ah nitin mamawh a la lut ṭan tih a tarlang.

Health department hmalaknain Border Security Force (BSF), Assam Rifles leh Manipur Police-te thawhpuiin mipui mamawh damdawi lak luh a ni bawk.

Kuki-Zo tribal-te tamna tribal district-ah hian Meitei hmeichhe pawl bultumin kawngpui dan a nih avangin nitin mamawh lak luh kawngah harsatna an tawk mek a ni. Bungraw phur motor-te pawh helai hmun hi a ralmuan loh avangin an kal duh lo bawk.

August 21 khan Kangpokpi district-a Meitei-te awmna valley area panna Dimapur-Imphal National Highway pahnih chu Kuki pawl hoin an dang ve thung. Mahse mamawh lak luhna kawng dang a awm avangin, Kuki pawlho kawng dan chu Meitei lamin an buai phah lutuk lo a ni.

State sorkar chuan tribal area-a awmte tana mamawh lak luhna kawng dang a ngaihtuah mek a, "Churachandpur district-a nitin mamawh lak luhna Imphal-Dimapur(Nagaland) kawng chu a hman theih tak loh avangin, Silchar(Assam) leh Aizawl (Mizoram) lam aṭangin nitin mamawh lak luh dan ngaihtuah a ni," tiin sorkar thuchhuah chuan a tarlang.

Nitin mamawh lakluh chu district leh district inkara dan leh thupek kenkawh chungchangah leh bungraw phurute'n Imphal-Churachandpur kal an duh leh duh lohah a innghat thui hle, a ti bawk.

National Highway-a security lama harsatna awmte chu Assam Rifles, Central Armed Police Forces, district trade and commerce department leh khawtlang mipuite nena thawk hoin State Police-te chuan hma an la zel a ni, tiin state sorkar chuan a sawi.