Tipra Motha hotuin Amit Shah hmu

Tipra Motha hotu, Pradyot Kishore Manikya Debbarman chuan Tripura by-election neih hma ni tlemte la awmin, New Delhi-ah Inrinni khan Union Home Minister Amit Shah a hmu.

September 5 hian Tripura assembly seat 2-ah by-election neih a ni dawn a ni.

BJP national spokesperson leh Northeast coordinator, Sambit Patra chuan X-ah Tipra hotu leh Amit Shah-te meeting neih thu hi tarlangin, inbiakna hlawk thlak tak an nei tih a sawi. Hruaitu pahnihte hian tun hnaia sawi nasat tak, indigenous-te chanvo leh an hmasawnna turte an sawi dun a ni tiin, Tripura-a leh India ram puma tribal-te chanvo leh dinhmun tihngheh hi prime minister hmathlir a nih thu a sawi lang bawk.

CPI(M)-in tunhnaia regional party-te nen inbiakna neiin Tripura-a Sepahijala district-a Dhanpur leh Boxanagar seat-a by-election neih turah thawhpuiah a sawm avanga Pradyot leh Shah-te hi an inhmu nia rin a ni.

Hetih lai hian Debbarman lam hnai tak chuan Debbarman leh Shah chu Tripura-a tribal-te'n sorkar laipui laka an thil phut neih chungchangah, sorkar laipuiin Tipra Motha leh regional party dangte biak rawn vek a tum vang zawka inhmu an ni, a ti thung.

Tipra Motha chief hian a party chuan by-election neih turah hian CPI(M) chu a thlawp dawn lo tih social media-ah a lo sawi chhuak tawh a ni. Congress party chuan by-election hi chuh an tum loh avangin BJP khingpui ber tur chu CPI(M) party an ni.

Boxanagar constituency-a CPI(M) MLA Samsul Haque chu a boral avangin by-election hi neih a ni dawn a, Dhanpur bialtu Union Minister Pratima Bhoumik chu MLA a nihna aṭanga a ban avangin by-election hi neih a ni dawn thung.