Manipur Assembly Session-ah inhnial buai

Manipur-a tualchhung buaina a chhuah hnua Assembly Session hmasa ber, Thawhṭanni, August 28-a neih chu member-te nasa taka an inhnial buai avangin tihtawp a ni.

Assembly Session chhehvela thil thleng lian zualte :

- House chhungah eptu pawl leh treasury bench-te nasa taka an inauh buai avangin Speaker Thokchom Satyabrata Singh chuan session a titawp. Eptu pawl member-te chu "Save Democracy" tiin House chhungah an au.

- Congress party chuan tualchhung buaina chhuak avanga nunna chante sunna 'two-minute silence' chu an dodal bakah, ni khat awh session chu ni nga atana pawhsei an duh. Session-ah hian question hour leh private member motion siam a ni lo.

- Manipur assembly budget session hnuhnung ber chu February-March khan neih a ni a, May 3 aṭanga tualchhung buaina chhuak avangin monsoon session hi sawn hlat a ni.

- Kuki-Zomi tribal pawlte chuan one-day session neih chu duh loin, tribal MLA 10-te chu session-ah hian an tel lo. Assembly house awmna hmun, Meitei tamna Imphal Valley-a kal chu him loah an ngai.

- Kuki-Zomi pawlte chuan Governor chu assembly session sawn turin an ngen a, mahse, an ngenna chu hnawl a ni. Manipur minister Sapam Ranjan Singh chuan, "Inrelbawlna hran a awm dawn lo tihah sorkar chu a ding nghet a ni," tiin a sawi.

- Manipur state BJP chuan tualchhung buaina chungchangah assembly chuan resolution a siam ngei an rin thu an sawi. Tribal pawlte erawh chuan assembly-in resolution a siamte chu Kuki area-ah zawm a ni lo ang, an ti thung. Congress pawhin one-day session chu mipui tan hlawkna engmah a awm lo an ti bawk.

- Meitei civil society group leh eptu party aṭangin assembly session nei tura nawrna a nasa hle. India danpui hnuaia Article 174-ah chuan session hnunhnung ber aṭanga thla ruk chhungin assembly session hi neih leh tur a ni, tih a inziak.

- Sorkar chuan thla hmasa khan August 21-a session nei turin rawtna a lo siam tawh a, Raj Bhavan lam aṭangin green signal an neih theih loh avangin August 28-ah sawn a ni. Kar liam ta khan Chief Minister Office chuan August 29-ah assembly neih a nih tur thu a puang.

- Assembly session ṭan hma ni hnih khan Manipur khawpui Imphal-ah mi luah tawh loh in pathum hal a ni. Imphal West district-ah Pathianni zing khan mi pakhatin security mi leh sa hnen aṭangin ralthuam a chhuhsak bawk.

- Manipur-ah hian Meitei-te'n Scheduled Tribe (St) status pek an phut avangin Kuki tribe-te leh Meitei-te inkarah buaina hi a chhuak a ni. Buaina chhuak avang hian mi 170-in nunna an chan tawh a, mi sang chuangin an in leh lo an chan bawk a ni.