Assam-ah tuilian tuartu mi nuai 1.90 tling tawh

Assam tuilian chuan ziaawm lam a la pan thei lo a, tuilian tuar hi mi nuai 1.90 tling tawhin, mi pakhatin nunna a chan belh leh.

Ruah nasa taka a la sur reng avangin lui chim chin a sang zel a, state chhung hmun hrang hranga lui tam zawkte chuan hlauhawm chin an pel tawh hlawm a ni. Brahmaputra luiah tui a tam avangin Guwahati leh Jorhat-a ferry service pawh tihtawp rih a ni bawk.

Assam State Disaster Management Authority (ASDMA) chuan Sivasagar district-a Demow hmunah mi pakhatin nunna a chan tih an sawi a, lui lian avanga nunna chan zat chu mi 15 an tling tawh a ni.

ASDMA chuan district 17 chu tuiin a la chim mek a, hei hian mi 1,90,675-te nunphung a tibuai mek tih a sawi. Lakhimpur district chuan tuilian tuar nasa ber niin, mi 47,338-in tuilian hi an tuar mek a, Dhemaji district-in dawtin, tuilian tuartu mi 40,997 an awm bawk.

Relief camp pahnihah mi 427 an khawsa mek a, relief distribution centre 45 siam a ni bawk a ni.

ASDMA bulettin tarlan danin, thlai chhinna ram hectare 8,086.40 chu tuiin a chim tawh a, ran 1,30,514 chuangin tuilian hi an tuar bawk.

Dibrugarh, Dhubri leh Tezpur-ah Brahmaputra lui leh, Jorhat-ah Nematighat lui te chuan hlauhawm chin an pel tawh a ni. Beki, Jia-Bharali, Disang, Dikhou leh Subansiri luite pawhin red mark an pel tawh tih ASDMA bulletin chuan a tarlang.

Tuilian hian Udalguri-a Biswanth leh Darrang hmunah tuilian danna tura siam embankment a tihchhiat bakah, state chhung hmung hrang hrangah kawng, lei, power pole leh school tam tak a ti chhe tawh bawk a ni.