Assam tuilian tuartu an pung zel

Assam-ah Thawhlehni khan tui a len belh leh a, tuilian tuartu hi mi 3,07,489 an tling tawh. Tuilian avang hian district 21-a khaw 756-te an buai mek a ni.

Biswanath, Chirang, Darrang, Dhemaji, Dhubri, Dibrugarh, Goalpara, Golaghat, Jorhat, Kamrup, Kamrup Metropolitan, Kokrakhar, Lakhimpur, Majuli, Morigaon, Nagaon, Nalbari, Sivasagar, Sonitpur, Tamulpur leh Udalguri district-ahte tuilian hi an tuar.

Lakhimpur chu tuilian tuar nasa ber district an la ni zel a, tuilian tuartu mi 71,889 an awm mek. Majuli-in dawtin tuilian tuartu mi 47,163 an tling tawh a, Golaghat (40,921), Biswanath (37,420), Darrang (27,941), Sivasagar (21,754) leh Dhemaji (20,352)-te chu tuilian tuar nasa zual district an ni.

Tuilian nasat zualna district pakuaah relief camp 91 siam niin, hetah hian mi 689 an awm mek.

State Disaster Response Force (SDRF), Fire and Emergency Services (F&ES) mi leh sa, district administration leh Aapda Mitra volunteer-te chuan tuilian tuarte chhanchhuah leh chhawmdawl hna hi an thawk a ni.