Nagaland-in rilru lama harsatna nei tan Tele-MANAS hawng

Nagaland sorkar chuan state chhunga rilru lama harsatna neite tana hman tur, Tele-Mental Health and Neuroscience (Tele-MANAS) programme a hawng.

He programme hi National Health Mission director Dr Ritu Thurr chuan Kohima-a State Mental Health Institute-ah Thawhlehni khan a hawng a ni. Thurr chuan rilru lam hriselna chuan thil ngaihtuah dan te, rilru put hmangte, chetzia te, midang nena inlaichinna te, thil harsa hmachhawnte leh thuthlukna siamte a huam vek a ni, tih a sawi.

Tele-MANAS chu rilru lama harsatna awmte sukiang tura din a ni tih sawiin, hemi hmang hian rilru lam enkawl thiamte chu telephone-in rawn theih an ni dawn a ni, a ti. Doctor pan hreh vanga enkawlna dawng lo tam takin an chhawr ṭangkai tur thu a sawi bawk.

He hmalakna hmang hian, rilru lam harsatnate chu hriat hma leh enkawlna an dawn hma a beisei thu a sawi. Thurr chuan Tele-MANAS chu hmalakna ṭha tak a ni tih sawiin, hei hian rilru lam hriselnaah hmasawnna a thlen dawn bakah, khawtlangin rilru lama harsatna neite kan ngaih dan dik lo pawh a tikiam dawn a ni, a ti.

State Mental Health Institute senior medical officer Dr Nuvotso Khesoh pawhin thu sawiin, rilru lama harsatna nei tam zia leh, he natna hi khawvela natna leh rualbanlohna thlentu lian ber a nih thu a sawi.

National Mental Health Programme deputy director Suyimtenla Jamir chuan Tele-MANAS chu ram pumah ṭangkai taka hman a nih thu sawiin, October 2022-a hman ṭan a nih aṭang khan mi nuai 2 chuangin he helpline hi an rawn call tawh tawh a ni, a ti. Nagaland state-a rilru lam harsatna tam ber chu exam vanga rilru hahnate, ruihhlo ngawl vei te, hna hmuh loh vang leh chhungte thlawpna dawn ṭhat loh vangte a ni tlangpui niin a tarlang.