Kuki-Zo pawlin ram pawna pawl hrang hrangte inrawlh turin ngen

World Kuki-Zo Intellectual Council (WKZIC) chuan political party zawng zawng, NGO, human right group, international forum leh khawvel hmun hrang hranga pawl awmte chu Manipur-a hnam bing thah/suatna thleng mekah inrawlh turin an ngen.

Manipur-ah hian August 29 hnua Naranseina, Thamnapokpi, Ngangkha Lawai, leh Khoirentak hmuna buaina thar chhuakah mi paruk thah leh mi 13 hliam tuar an awm leh a, hemi hnu hian WKZIC chuan ngenna hi an tichhuak a ni.

Indigenous Tribal Leaders Forum (ITLF) pawhin buaina thar a chhuah leh avang hian emergency shutdown an puang ve nghal bawk.

WKZIC chuan Manipur sorkar leh Meitei militant-te chu buaina chhuak tharah hian inrawlhah puhin na takin an dem tih an sawi. Sorkar laipui chu Manipur-a chi bing inthahna thleng mek an hriat loh der avangin a dem thu a sawi bawk.

"Kuki-Zo hnam chu Indian freedom movement tana nasa taka lo bei tawh ṭhinte thlah kal zel an ni. Mahse tunah chuan anmahni ram ngeiah suat an ni mek," tiin WKZIC secretary (information and publicity) LK Minthang a sawi.

Minthang chuan sorkar laipui a ngawi tlat hian chi bing suatna thleng mek hi a thlawp tih a lantir a ni a ti a, sorkar laipui chu Manipur tualchhung buainaah hian an ram leh leilung hlutnate neih tuma inrawlhah a puh bawk.

WKZIC chuan tharum thawhna thleng chu titawp tur leh buaina chawk chhuaktute man turin a ngen a, thisen chhuahna tihtawp a nih theih nan international community-te chu inrawlh turin a ngen a ni.