Meghalaya : Private sector-a hna pek phutin an nuar

Meghalaya-a Hynniewtrep National Youth Movement (HNYM) member 100 chuang chuan an state chhunga ṭhalaite tan hna thawh tur a awm loh avanga lungawi lohna lantir leh, private sector-a hna pek phutin Shillong khawpuiah kawng an zawh.

PWD (Road and Building) hmaah kawngzawh hi ṭanin, nawrh huaihawttute hian flag sen leh placard-te an keng a ni. CrPC Section 144 tlawhchhana administrative border huam chhunga mipui pun khawm khap ni mah se, ṭhalai pawlte hian nawrh hi an huaihawt lui tho a ni.

HNYM president Louis Dohtdong chuan sorkarin private sector-a hna 80% chu ṭhalaite tan a hauh tur a ni tia sawiin, "Meghalaya-ah hian PSUs ṭhahnem tak a awm a, mahse, state chhung ṭhalaite'n an chhawr ṭangkai lo. Haryana, Mumbai, Punjab leh state dangahte chuan private sector-a hna 70-80% hi state mipui tan dah ṭhin a ni," tiin a sawi.

Meghalaya sorkar chuan entreprenuership programme-ah pawh hmalakna ṭha a nei lo tih sawiin HNYM president chuan, entrepreneurship chu mi hausate leh sorkar-a tlatlumte tan chauh a ni, a ti. Tunhnaia militant outfit ding tharte pawh hi ṭhalai hna nei lo beidawng rah chhuahah a puh bawk.

Dohtdong chuan an thil phutte an ngaihsak theih nan sorkar-ah an nawr zel dawn a, September 4 hian chief minister an hmu dawn tih a sawi bawk a ni.