Assam : Silsako eviction duh lotute'n lungawi lohna lantir

Guwahati-a Guwahati Metropolitan Development Authority (GMDA)-in sorkar rama dan loa awm nia sawite hnawhchhuah hna, eviction drive an kalpui mek dodalna lantirin nimin khan hmeichhia 100 chuang Silsako-ah an pung khawm.

Silsako-ah hian ram bigha 130-a zau chu dan loa neih a ni tiin police leh dan kengkawhtute chuan lak let tumin hma an la mek a ni.

Thuneitu lamin Silsako hmuna chengte hnawhchuah hna an kalpui lai chu duh lohna lantirin mipui an pung khawm a, mipuite leh dan kengkawhtute inkarah buaina a chhuak zui a ni.

Lungawi lohna lantira pung khawm hmeichhiate chuan eviction kalpui mek chu an duh lohzia lantirin an kawr an phelh a ni.

Police-te chuan mipui pung khawmte chu hnawhdarh tum mah se, hmeichhiate chu kal sawn duh loin, an in aṭanga hnawhchhuah an nih ai chuan thih an thlang zawk tih an sawi.

Sorkar official lam chuan helai hmuna chengte chu an awmna chhuahsan turin notice an pek thu sawi mah se, mipuite chuan kalna tur hmun dang an neih loh thu leh sorkarin insawn chhuahna tura ruahmanna engmah a siam loh thu an sawi thung.

Assam Human Rights Commission (AHRC) thurawn angin Kamrup-Metro district administration chuan Silsako Beel-a eviction drive kalpui chungchang chu Additional district magistrate-in chhui chianna nei turin thupek a lo chhuah tawh a ni.

Kumin February thla khan GMDA chuan Guwahati-a wetland-te venhim nan Silsako Beel-ah hian dan loa awmte hnawhchhuahna eviction drive a lo kalpui tawh a, dan loa sak, in 250 chuang hemi ṭum hian tihchhiat a ni tawh.

Tun ṭuma eviction drive kalpuiah hian in 100 chuang tihchhiat a ni leh ang.