Nagaland sorkarin Forest Act leh UCC duh lohna resolution pu lut dawn

Nagaland sorkar chuan Forest Conservation (Amendment) Act leh Uniform Civil Code (UCC) duh lohna resolution chu state Assembly-ah a pu lut dawn.

Sorkar thupuangtu, parliamentary affairs and power minister K.G. Kenye chuan September 11 hian ni li awh Assembly session neih a ni dawn tih sawiin, he hunah hian resolution hi put luh an tum a ni.

Nagaland-a Nationalist Democratic Progressive Party (NDPP) kaihhruai ṭangrual pawl sorkar chuan Forest Conservation (Amendment) Act leh Uniform Civil Code (UCC) chu an duh loh thu an lo sawi tawh a ni. MLA 12 nei Bharatiya Janata Party (BJP) pawh sorkarna fawng vuantu-ah hian an hian an tel.

“Sorkar chuan Zirtawpni khan state chhunga tribal pawl pawimawhte leh civil society organisations (CSOs)-te nen sawihona neiin resolution put luh an rel a ni, tiin Kenye chuan media mite a hrilh.

Kenye chuan Naga pawl hrang hrangte leh mithiamte chuan India danpui hnuaia Article 371A-ina special rights a pek chu Forest Act chuan a khawih pawi an hlau tih a sawi. Article 371A chuan Nagaland-a khawsa Naga-te chu an thil chin ṭhan, hnam kalphung, sakhuana leh khawtlang inrelbawl danah te, ram neih leh hralh leh leilung hausakna chungchangah special protection a pe a ni.

Zirtawpnia meeting neihah hian, tribal pawlte leh CSO-te chuan Forest Act leh UCC chu pawm lo turin sorkar an ngen tih Kenye chuan a sawi. Kumin July thla khan Nagaland sorkar chuan UCC chu Nagaland huamtir lo turin Law Commission chu a lo ngen tawh bawk.

Minister chuan Delhi-a chief minister Neiphiu Rio-a a zin ṭumin 22nd law commission hnenah an ngenna hi an theh lut tawh tih a sawi. Hemi ṭum hian Union Home Minister pawh an hmuh thu sawiin, Home Minister chuan Kristian-te leh tribal state ṭhenkhatte chu UCC huamtir lo turin sorkar laipui chuan a ngaihtuah mek tih a lo hrilh a ni, tiin a sawi.

“Nagaland mipuite hian UCC hi an pawm dawn lo a, hetiang dan siam tumna awm ringawt pawh hi an dodal a ni. Kil tin aṭangin he dan dodalna hi a awm a, tribal pawlte leh civil society organisation-te chuan ualau takin UCC an pawm loh tur thu hi an sawi,” tiin Kenye chuan a tarlang.