Manipur : SC-in kawng dan tuarte mamawh pe turin hriattir

Supreme Court chuan Manipur-a kawngpui dan a nih avanga tuartute mamawh, eitur leh damdawite chu a theih dan ang anga pe chhuak turin sorkar laipui leh Manipur sorkar a hriattir.

Chief Justice DY Chandrachud leh Justice JB Pardiwal ṭhutna bench chuan state sorkar chu kawng dan tuartute nitin mamawh pek dan kawng hrang hrang ngaihtuah turin a hriattir a, a ṭul a nih chuan thlawhtheihnain nitin mamawhte hi pek dan a ngaihtuah mai tur a ni, a ti.

“Central leh Manipur sorkar chu nitin mamawh chaw, damdawi leh thil dangte chu kawng dan tuartute hnenah pe turin hriattirna kan ti chhuak tawh. Economic blockage hi tumahin an tuar tur a ni lo,” tiin bench chuan a sawi.

Court chuan kawng dan chungchang chu dan kengkawhtute’n an buaipui tur a ni a, mahse mihringpuite ngaihtuah chungin, sorkar chuan mamawh lak luh dang kawng awm thei zawng zawng, thlawhtheihna hmanga thlak thlengin a ngaihtuah tur a ni, tiin a sawi. Court chuan hemi chungchanga sorkar hmalakna chu Court hriattir ve turin a ti nghal bawk.

Supreme Court-in Manipur chungchang chhui chiang tura committee a din tana ding, Meenakshi Arora chuan Manipur-a Moreh hmunah kawng dan a ni a, mipuite chuan nitin mamawh takngial pawh an dawng thei lo, tih Court hnenah a thlen a ni.

Kawng danna hmunah mipui rilṭama an awm mek laiin, relief camp ṭhenkhatah Tangseh leh Sentut hri a leng mek, a ti bawk. Moreh bakah hian Manipur leh Nagaland kaltlanga Assam –Mizoram kawngpui National Highway 2 pawh dan a nih thu Court-ah hian thlen a ni bawk.

CJI chuan kawng dan tihtawp chu thil harsa tak a nih thu sawiin, “Kawng dangtute hi tualchhung mipuite an nih avangin armed forces-te chu kawng dan ti tawp turin thu pek pek ngawt theih an ni lo,” tiin a sawi.