Assam-in kum 2026-27-ah medical college 21 neih tum

Assam chief miniter Himanta Biswa Sarma chuan kum 2026-2027 ah Assam chuan medical college 21 a neih hman tawh tur thu a sawi.

Chief Minister hian kar liam ta Zirtawpni khan Nagaon Medical College-a academic session hmasa ber opening ceremony-ah he thu hi sawiin, “Tunah hian Assam-ah medical college 12 a awm tawh a, sorkar chuan college thar pakua din turin hma a la mek bawk a ni. Kum 2026-27 ah chuan Assam chuan medical college 21 a nei tawh ang,” tiin a sawi.

Sarma chuan Tinsukia Medical College chu kumina sak zawh a ni dawn a, Charaideo leh Biswanath-a medical college-te chu nakkumah mipui tan hman theihin a awm tawh dawn, tih a sawi bawk.

CM chuan medical college pali dang pawh kum 2026-27 ah zawh fel hman a nih tur thu leh, Sivasagar leh Karimganj district-a medical college chu kuminah sak ṭan a nih tur thu a sawi a, “Goalpara-ah medical college dang nakkumah sak a ni ang,” a ti.

MBBS zirna seat awm zat pawh kum 10 liam hmain a letin a pung tih sawiin Sarma chuan, ”Kum 2014 khan Assam-a MBBS seat awm zat chu 726 a ni a, tunah erawh medical college a awm belh zel avangin MBBS seat awm zat chu 1,500 a ni tawh. Post Graduate seat awm zat pawh 395 aṭangin 722-ah a pung chho tawh bawk,” tiin a sawi.