Manipur sorkarin Editors Guild member-te lakah FIR theh lut

Manipur chief minister N Biren Singh chuan an state-a buaina chhuak tihpunlun tuma puhin, Editors Guild of India (EGI) president leh member pathum lakah FIR an theh lut tih a sawi.

Chief Minister hian nimin khan Imphal-ah press conference neiin, an state-a buaina chhuak avanga tualthi tam tak leh, chenna in chan tam tak an awm laiin, EGI chuan an buaina ṭobul tak hre loin, ṭan lam neiin report a tichhuak a ni, a ti.

Editors Guild hian kar hmasa khan report a tihchhuahah, Manipur tualchhung buaina thleng chungchanga media-te thil chhuah dan chu sawiin, media outlet ṭhenkhat chuan ṭan bik neiin thil an tichhuak ṭhin a ni, a ti. Hei bakah hian internet service tihtawp a ni chu na takin a sawisel a, press mite tan hnathawh a tihbahlah bakah, Manipur state hruaitu ber chu buaina chhuakah pawl pakhat ṭan bik neiah an puh bawk.

CM Singh chuan EGI report tihchhuah chungchangah state sorkar chuan an president Seema Mustafa bakah, August 7-10 chhunga media report chungchang zir chiang tura an state tlawhtu, senior journalist pathum - Seema Guha, Bharat Bhushan leh Sanjay Kapoor-te lakah FIR hi theh luh a nih thu a sawi a ni. "Heng mite hi anti-state, anti-national an ni a, state mipuite rilruah tur phul turin an rawn kal a ni. Hei hi lo hre lawk ni ila chuan an rawn kal hi ka remti lo ang," tiin a sawi.

EGI hian September 2-a report an tihchhuahah, Manipur state hotu berin Kuki-Zo tribal-te dan loa an state-a pem lut, 'illegal immigrant' leh 'foreigner' tia a puh ngawt chungchangah data leh evidence rintlak behchhan engmah a nei lo tiin an tarlang. Myanmar ram buaina avanga Manipur-a raltlan eng emaw zat lut chu Kuki-Zo hnam awm zawng zawngte an vaia 'illegal immigrant' tia puhna remchangah a hmang a ni, a ti.