Imphal-a Zo-Kuki chhungkua chambangte chhuahtir

Manipur tualchhung buaina chhuah hnua Imphal-a Zo-Kuki la chambangte chu security force-te'n an chenna in aṭanga tihluihnaa an chhuahtir tih report a awm hnuah, Congress Party hruaitu P Chidambaram chuan Imphal Valley-ah hnam pakhatin a hmelma hnam dang a nuai bona, "ethnic cleansing' chu zawh fel a ni ta tiin Pathianni khan a sawi.

"The Hindu report-a tarlan danin, Imphal-a Kuki chhungkaw panga la chambangte chu thuneitute'n tihluihnain an in an chhuahtir a ni. Hemi awmzia chu Meitei-te awmna Imphal Valley-ah "ethnic cleasing" chu zawh a ni ta tihna a ni," tiin union home minister hlui chuan X-ah a post.

"State sorkar thuneihnain 'ethnic cleansing' kalpui a ni a, sorkar laipuiin state sorkar chu Constitution angin a kal a ni, an ti bawk. Tun aia zahthlak hi a awm thei lo. India rama dan palzutna nasa tak thleng mek chuan zual lam a pan a ni," a ti bawk.

Kar liam ta Zirtawpni zan khan Imphal-a cheng kuki 24-te chu security force-te chuan Imphal chu an tan a him lo tiin an chenna in aṭangin an chhuahtir a ni tih an chhuahtir zinga mi 2 chuan Inrinni khan an sawi.

Imphal Valley-a khawsa Kuki sang chuangte chuan tualchhung buaina chhuah hnuah Imphal Velley hi chhuahsanin tribal-te awmna hill district lamah an tlanchhia a ni. Chutiang bawkin tribal-te tamna hill district-a Meitei khawsate chu Imphal Valley lamah hian an tlanchhe ve bawk.

Kuki hnam ṭhenkhat chu security venhimna hnuaiah Imphal West district-a New Lambulane hmunah an la khawsa a, mahse, Zirtawpni zan khan an chenna in chu chhuahsan turin thuneitute'n an hriattir tih an sawi.

Security official lam chuan an tan a hlauhawm avangin, Kuki-te chu zanlaiah chhuahtir an ni, an ti thung. Sorkarin awmna tur a siamah heng chhungkuate hi dah an ni tih an sawi bawk.